World136 Logo  
 Home>>Bollywood>>Madhuri Dixit Biography in Hindi

Madhuri Dixit Biography in Hindi

madhuri dixit in urdu

Madhuri Dixit was born 15 May 1967, in a Marathi-speaking Koknastha Hindu Brahmin family. Madhuri Dixit father Shankar Dixit and mother Snehlata Dixit. Madhuri is called as the dancing diva of Bollywood. Dixit made her acting debut in Rajshri Productions movie Abodh in 1984 opposite the Bengali actor, Tapas Paul. On 17 October 1999, Dixit married Shriram Madhav Nene. They have two children Raayan Nene and Arin Nene.

 

Madhuri Dixit Urdu

Aik lamhe ko zara apni aankhein band karein. Aur tasawwar mein khood ko 90 ki dehayi mein le jayein. Ab wahan aik aisi filmi shakhsiyat ko talash karein jis ne bila shirkat ghaire is dor par hukmirani ki. Imkan to yahi hai keh Madhuri Dixit ki mann moheni shabih ubhre gi. Kiun keh is dor mein Hindi film industry par agar kisi actress ne apna sikkah jamaya to vo Madhuri Dixit hai. Madhuri ka raqs aur dil ko chu lene wali adakara na salahiyatein, yeh sari khasoosyat Madhuri kay pekar mein yakja thin. Khasoosyat ki isi hum aahngi ne inhein aik aam filmi heroine kay moqam se kahin aage puncha dia. Inhein apne dor mein km o besh wahi moqam hasil tha jo Rajesh Khanna ya Amitabh Bachchan ne apne apne dor mein paya. Madhuri Dixit ki filmein in hi kay naam par bikti aur in hi kay naam se chalti thin. Yeh vo unhoni thi jo mardon ki is industry mein ghalban pehli martaba huyi. In kay item song aise hua karte the keh jinhein aik martaba dekh kar dobara dekhne ki hos paida hoti thi. Log mehaz in ka dance dekhne ki khatir bhi cenema gharon ka rukh karte the aur raqs kay doran screan ki taraf sikke uchalte the. Kisi filmi actress ki is qadar ghari maamooli pazerayi is se pehle ya ab tk dekhne mein nahi aayi!

Madhuri 15 May 1967 ko Mumbai mein paida hoyin. Aur bachpan hi se inhein, kathak ki tarbiyat di jane lagi. Inhon ne 17 saal ki umer mein film Abodh se apne filmi career ka aaghaz kia magar afsos keh yeh film box office par kamyab na ho saki. Is kay baad inhon ne vo aik filmon mein supporting roll ada kiye aur phir in kay career ko nayi zindagi is waqt mili jb N Chandra ne inhein apni film “Tezaab” mein bator mohini “ cast kia. Is film mein yaad gar tareen geet “Aik do Teen” par Madhuri ki performance dekh kar film been in kay ishq mein giraftar ho gaye aur tb se le kar ab tk yeh sehar isi tarah qaim hai.

Kisi bhi qisam kay tanaza ya scandal se be neyaz, Madhuri ne 1999 mein America mein rehne wale surgeon Dr. Sriram Nene se shadi karli. In kay do bête Arin and Ryan hain. Shadi kay baad Madhuri ne filmon se kinara kash ikhtiyar kar li lein TV shows mein gahe gahe namoodar ho kar vo shayeqeen ko apni mojoodgi ka ahsaas delati rehti hain.

Madhuri Dixit ab mehaz aik celebrity hi nahi balkeh zumma dar khatoon e khana aur pyar karne wali maan bhi hain. Yehi wajah hai keh vo ghar aur kaam ke drmiyan bari khoobsurti ke sath tawazan qaim rkhti hain. Subah apne dono beton Arin and Ryan ko nashta karwaye beghair vo ghar se nikalne ka tasawwar bhi nahi kar sktein. Lehaza jb donon bete school rawana ho jate hain tb hi Madhori apne kaam par jane ki taiyari karti hain. In dinon vo televition dance show Jhalak Dikhlaja mein judge ke faraiz anjaam de rahi hain. Is liye in ke din bhar ke maamool mein dance aur masti ke eleva paristaron se mulaaqaat bhi shamil rehti hai.

America shehri Dr. Sriram Nene se shadi racha kar America mein sakoonat pazeer madhori ab 15 saal kay baad mambai wapis aa’rahi hain. Mustqil Mumbai wapis aane kay sawal par Madhuri ne bataya keh vo aur in kay pati chahte hain keh in kay bache apne desh mein pal barh kar yahan ki sanskrity (tehzeeb) sikhein.

Hindi Movies of Madhuri Dixit:

Zel mein pasandida adakara kay filmi career ka aik mukhtasar sa khakah pesh kia gia hai jo yaqinanan aap kay liye dilchaspi ka bais hoga.

Abodh (1984): Madhuri Dixit ne apne filmi career ka aaghaz “Abodh” se kia. Shadi kay mozoo par banayi jane wali is film mein aik aisi larki ki kahani dekhayi gayi hai jo shadi shudah zindagi kay taqazon aur masail se qatyi na waqif hai. Film kay aaghaz kay waqt Madhuri ki umer mahaz 16 baras thi , lehaza camera kay samne in ka tas’sur bilkul haqiqi dekhayi deta hai. In ki adakarana salahiyatein bhi is pehli film mein hi nazar aagayi thin. Film go keh box office par nakam ho gayi thi lekin Madhuri sb ki nazoron mein aachuki thi.

Tezaab (1988): jo hi mqbool aam geet “Aik Do Teen” ki dhun hawa kay dosh par ubhriti thi, is ka sehar har aik ko apni giraft mein le leta tha. Madhuri ka yeh sehar ab tk isi tarah qaim o daim hai. Film Tezaab ne Madhuri ko lakhon balkeh karoron dilon ki dharkan bana dia. Film ko is kay item song “Aik Do Teen” par Madhuri kay walhanah raqs ki badolat be missal kamyabi naseeb huyi.

Dil(1990): Is film kay baad Madhuri ki adakari kay bare mein jo log pur yaqeen nahi the, in ka yeh shubah bhi door ho gia keh Madhuri achi adakara sabit ho skti hain ya nahi. Kiun keh ab inhein aik mokammal adakara tsleem kar lia gia tha.

Saajan(1991): Aik singer aur aik maazoor shayar bina dekhe aik doosre ki muhabbat mein giraftar ho jate hain. In ki yeh muhabbat khatoot kay tabadle kay zriye parwan charti hai. Is qism kay farsooda plats 60 ki dehayi kay sath hi khatam ho gaye the. Lekin yeh dar asal Madhuri ka jadu hi tha jis kay bais logon ne film ko pazerayi bakshi.

Beta (1992): is melo drama type film mein Madhuri kay kaam ko buhat saraha gia. Film mein in ka kirdar buhat jandar tha.

Khal nayak(1993): hum mein se ziadah tar logon ko film “Khal Nayak” yaqinan is kay zabar dast shuhrat pane wale item number “Choli Kay Piche Kia Hai” kay sabab yaad hogi . Yahan Madhuri ne aik bar phir sabit kar dia keh vo har surat mein shayeqeen ki towajjah apni janaib mabzol karana janti hai.

Hum aap kay hain kon(1994): is film ko Madhuri kay filmi career ka sartaj qarar dia jaye to kuch ghalat nahi hoga. Pehli film kay baad Madhuri ne aik bar phir raaj shari production kay banner tale kaam kia. Salman khan aur Madhuri kay Romans ka dhima andaz is film ki numayan khasoosyat thi jiski wajah video aur TV sarkit par yeh film aik classic ka darjah ikhtiyar kar gayi thi.

Martyudand (1997): Marityudand aik aisi film hai jis kay zariye yeh sabit hua keh koi acha director , kisi snjeeda mozo par banne wali film mein Madhuri ki salahiyaton se be had faidah utha skta hai.

Dil to pagal hai (1997): Mrityudand mein jahan Madhuri ne aik snjeeda kirdar rawaiti qisam kay getup mein ada kia wahan dil to pagal hai mein vo bilkul mukhtalif andaz mein jalwah gar huyien. Yeh khalisatan music aur dance par mabni film thi jis mein Madhuri ki maharat se raqs uruj par dekhayi deti hai. Is se pehle inhein foke aur rawiti dance ki mahir jana jata tha lekin yahan inhon ne apne maddahon ko apne contemporary yani jadeed dance ki salahiyaton ka bhi qail kar lia .

Pukar (2000): Is film mein hamre ird gird bsne wali koi sidhi sadi aur khaloos e dil key sath muhabbat karne wali larki nahi thi balkeh manfi rung liye huye is kirdar mein vo dil torne wali aik aisi khood gharz larki kay roop mein nazar aarahi thi jis ki muhabbat mein hasad raqabat ka jazbah shamil tha. Is film ko Madhuri ki un filmon mein shumar kia jaskta hai jin mein in ki performance bhar poor aur be had jandar thi. Box office par yeh film go keh kamyaab na huyi lekin Madhuri ne apne aap ko aik bar phir sabit kar dia.

Devdas (2002): Madhuri chandramukhi nami tawaif kay kirdar mein bila shubah is mashhor e zamana dastan muhabbat ki jaan thin. In ka kirdar bari ahmiyat ka hamil tha lekin unhon ne ziada uncha urne ki koshish nahi ki balkeh kirdar mein doob kar bari sahoolat aur pukhtagi kay sath use nibhaya. Inhon ne apni performance par best actress of supporting roll ki category mein film fair award hasil kia.

Aaja Nachle (2007): is musical film kay zariye Bollywood film nagri mein Madhuri ki wapsi amal mein aayi thi lekin bd qismati se shayeqeen ne is film ko pazerayii nahi bakhshi.

Tags: madhuri dixit urdu, madhuri dixit biography in hindi, hindi movies of madhuri dixit, hindi actress madhuri dixit, biodata of madhuri dixit, life history of madhuri dixit

Article
Beauty and Fashion
Biography
Bollywood
Celebrity
General Knowledge
Health Care
Horoscope
Hindi Songs
Islam
Jokes
Milli Naghmay
Poetry
Totkay
Recipes
Amitabh Bachchan
Sharukh Khan
Dilip Kumar
Salman Khan
Aamir Khan
 
counter for tumblr

@Copy Rights 2011 world136.com All Rights Reserved